小弟我對耳罩就唔係好專長,家中醜醜地只係入門級,用對 Beyer T1 同 AKG K812,擴就配返 Beyer A2 出,都無乜話花心機時間去搞… 今次去到 AV show無話刻意搵d 耳牛搞下,但係見到時又心思思放上耳聽下同埋影返幾張相… 咁都總算有兩三對扮下野出埋個耳牛枱擴回顧 (其實都唔算係咩回顧,只係配合返三篇既連貫性吧)… 睇黎日後我都要玩返多 d 牛牛拎返個feel 先
Crosszone
經過 Labkable 見到放左兩對 Crosszone 既 CZ-1,拎上手睇下整隻頭戴耳牛手功都好靚,Made in Japan 係唔同D! 心痕痕就拎上耳聽下… 音場好闊,有一份我從未感覺到既音場同空間感。合埋兩眼完全係感覺到自己置身響一個大型演示廳一樣,聲音由兩端進入,但又好似唔係好正中間咁黎,非常自然舒服。耳機係接上 KECES S3,上面寫住 「快將推出」,整體呢個組合我自己非常喜愛,樂器聽起來極之細緻,我係感覺到成個樂團既位置,佢地合奏時推動弦既力度…. 我諗大家又要準備使錢喇!!

Aroma
之前都聽聞過呢個紅到去日本既本地品牌會推軍家用,今次展商就展出左 Cygen 10 家用耳擴。我本來都好想好想聽下,可惜經過左三次都有人試緊呢部機,我只能望門嗟嘆!  希望有時間可以安排到 Aroma 度試一試呢部機既真正實力!

Final Audio
本來係試緊隻 E2000,但展商話不如試下隻 D8000 丫,好好聽架! 開頭我真係有少少想抗拒,因為我印象中既 Final Audio 頭戴係唔太啱我口味,一味得一浸高,所有野都薄過紙,而且之前d 耳牛都唔太輕仲好墜頭。但我拎對 D8000 上手後,輕身左好多,完全係一個舒服既重量感覺。ok,我就咁拎部 Sp1000 加個轉插之聽!  初步聽感係好似 K812 喎,不過 D8000 密度再高d 添! 展商話,不如咁丫,入去耳牛區,set 好哂有擴推,可以再聽真 d 喎! 小弟我老實不客氣 (我不嬲都唔客氣 ) 就衝左入去!  見到隻 D8000 駁住左部 Lindemann 既 Musicbook:25… 個心已經好興奮!! 唔買都玩下丫,戴上頭聽下隻2017 AV show 碟入面 LoLo 隻最愛是誰,果份人聲既感情同味道,我返屋企用入耳聽係無一隻能及 (仲使講咩?) !  “誰人是我一生中最愛,答案可是絕對” 聽到有想喊既感覺…   D8000 係完全將歌手既感覺演釋返出黎,每一粒音,每一個字都係充滿左感情… 響聲音上中低頻都係好包滿,不過空氣感係無 CZ-1  咁高,但如果以人聲我個人會俾好高分! 聽展商講價位大約係三萬內,以價論聲的話都係值呢個價位級數既~

Stax & LHLads
玩完對 D8000, 職員問我有無興趣玩埋枱 SRM T8000 呀?! 大佬你想我死我無理由拒絕既?! 入得黎都預左有命入黎無命出返去! 其實我望住枱 T8000 再望住對 SR009… 職員就問,不如我用埋部 ViDac Infinity 做前及俾你試下呢!除左深呼吸我真係諗唔到有咩好做! 一對頂級靜電耳機響呢個組合下,推出黎既聲音,係澎湃,充滿氣氛,空氣感十足,職員仲話而家用緊條 10G 既 USB cable,確保百份百訊息來源! 對於我呢個耳牛既長期初哥,我已經唔識得用咩文筆去形容果一刻衝入我耳內既聲音…  我只係想再聽多陣,可唔可以俾我再聽多陣⋯⋯可唔可以⋯⋯ 奈何好多人都想試聽 T8000,我聽左十分鐘喇都係乖乖放手留返d 時間俾下位朋友去聽…..

Meters
咦,玩到成十萬蚊既家用,點解轉個頭變左呢對 OV-1?? 無既,都入左呢個booth 咁都玩下啦~ 咁一分鐘前都仲玩緊 SR009 ,呢個變化都好大下! 但係佢響耳罩外面個 VU 錶又幾吸睛喎! 咁講啦,追求非常音質既用家,對住佢係可以漠視,但係以潮品角度去睇,又都算又型得起,又有可以接受既聲音既 (拿,個人覺得好過 beats 架!) ,由其鍾意同 Beats  果類既低頻,咁呢對可以放入自己個list 度既… 起碼佢又有個降嘈功能先,或者有個 eq 功能,玩味點都俾 Beats 好點吧!

總結: 埋尾用耳擴耳牛, 始終玩佢都可以玩到去天價,而家要set up 好一套家用既頭戴設備真係財力同能力差 d 都搞唔掂! headfi 界別黎講對入門用家的確唔容易掌握住。經過今次 AV show 回顧希望小弟可以幫大家回味一下或者可以睇到 d  原來自己錯過左既野!! 希望下一年小弟仍然能夠響呢度為大家繼續播毒,帶大家進入毒海~

 

http://headfidy.com/forum/forum.php?mod=viewthread&tid=102810&extra=page%3D1