2018 年耳機文第一炮,之前就出左 player 喇,點都要轉返去”耳機區” 掟返轉

 

今次主角呢,佢係一個本地品牌,之前我已經入手過佢地出既線材 AG – Apollo,既然有新耳機出,咁點都同佢砌返個西裝組合評測一下,Audio Genetic 既 AG5 來吧!
外觀:
第一眼見到白雪雪既 AG5 感覺幾討好,不過個插座位透出左少少黃色,問過下舖店主主要係插座位做左加硬,令到整個插座更堅固,基本上插左條cm 插就睇唔到呢少少既瑕疵。有一點要讚既, AG5 既配戴感係非常舒適貼耳, 長時間配戴都無攰既感覺!  5 單元 3 路分音,一個最簡單又實際既方法,可能層次感上無其他十單八單咁仔細,但三頻既凝聚會比較簡單鮮明。

 

聲音:
初入耳既感覺大至上係擁有左多動鐵既優點,有唔錯既分析力,聽感上乎合三路分音既細節,而且接合位都做得相當既順滑。先講返個低頻, AG5 唔係量海既低頻,潛得都唔算十分深,但佢又唔會話聽落去好似無乜低頻,調音方面似乎係刻意地將個低頻調得較為輕巧鬆容d,從中就帶出左呢對耳機既強項,中高頻。呢對耳機我幾欣賞佢個中頻人聲,人聲基本上係樂器前大約一步至步半既位置,聽落人聲同樂器有分離感同有空間距離,亦凝做到一份空氣感,人聲結象力強,位置係人既正前方,聽落去係似歌手企響我前面個台,無透過咪高峰唱歌既感覺,人聲係幾有感情。而高頻既延伸以一對 5 單,佢既高至超高既延伸做得好細緻,有線條感。所以有時又真係唔使十幾單元先得,好好利用到單元特性,幾個單元都可以做到相對較果!  我配合埋條AG Apollo 西裝咁去聽,人聲同高頻樂器都有一份高麗典堂感覺!

 

總結:
個人認為手功可以再靚 D 就 perfect, 起碼見唔到插座下面d 加強,配戴上我已經無野可以挑剔。聲音主打聽人聲,女聲,acoustic 我會首選,高質錄音既口水歌亦有好高重現感。人聲同樂器分離度足夠,音場唔係非常闊果種,可以用線去嘗試改變較闊音場,我未試用 Calliope 去試,應該可以張個音場再打開d…. 咁我就留返呢個point 俾大家去親身感受下喇!!

 

睇埋相先啦!!

 

細細個盒仔,簡潔包裝

 

拎出黎,白雪雪耳機襯藍色logo

 

耳機內側,好配合耳型,非常舒適

 

用0.78 2pin , 好common 俾大家換線

 

我就急不及待換套西裝著下先

 

用 SP1000 去聽,一開聲都有唔錯表現喇,run 多七八十個鐘已經入狀態