開箱喇開箱喇! 睇睇下我都好似好耐無開耳機,ie80s… 其實都好似個零月前,哈! anyway! 來吧~
今次開個主角係 UM Mason V3! 細佬我本身有Mason 1, 2 代,2代俾堅細佬令左去玩就一去不回,唔緊要!今次黎埋個 V3….
先睇外觀,今次 V3 用左個銀拉絲紅/藍板面,比之前淨色無咁悶,又唔會話淨係得碳纖,金屬面咁普遍,我自己覺得係幾特別既! 大家睇相都可能睇到今次 V3 用左 JH 4pin 頭,仲有一個類似 64 之前用既 MAM 既扭掣,咁有咩用呢? 一陣講! 不過咁,今次個 JH 頭就真係 R 爆頭,佢又唔係 JH 個焊法,所以你地手上既 JH 線係無用既! 而佢個做法(原廠線) 係無分左右,只要用家左右調轉駁,聲底就用銅變銀/銀變銅… 聽落真係幾神奇,但確實我左右調轉佢,聲音又真係無調轉過,聲底又真係有少許變化! 之但係廠線個耳掛就真係好心做壞事,更加令到對耳機戴得唔夠穩陣,我會建議甩左個耳掛仲好!
咁聲音又點呢? 係單元上,由1, 2代既 12 單增加到 16 單, 但聲音仍然保持 Mason 系列原有風格,偏向柔和斯斯文文而高通透度。不過今次係中頻密度上提升左唔少,所有聲音還原度好高而且細緻。音場比之前兩代稍為闊多少少,高頻延伸亦比 2 代好 (我覺得 1 代係好過 2 代 ),上去高至超高時感覺係好順暢。低頻就不嬲都唔係 Mason 系統既強項,我只可以話係交出比較高質素既低頻,快,但唔深。始終整體上係比較大氣,鬆容,用黎聽小品,輕快既樂曲比較好,另外用黎聽大棚野我就覺得一絕。樂器既定位精準,有夠闊既音場,合上眼就如置身一個好大既音樂廳,結象力,空氣感都強,與其聽人聲不如聽大棚交響。
講返果粒野,佢話可以令到個隔音提高,我試過係有d 功能,都算明顯,效後聲音仲有小許提升,聲音更加扎實有質感,不過好似要隨地方既 noise 去較,我就扭去中間算喇!!
總結:
配戴上,要拆個耳掛先好d,手功保持 UM 高質量,但點解用 JH頭就有少少未摸清佢諗法⋯⋯ 聲音係好鬆容,還原度高。唔太啱basshead, rock, metel 玩,鍾意小品同交響就呢對會交足 101 分功課。仲有,要煲返 150 小時 d 單元先融合到,開聲果下我覺得係有小小亂既。咁大家如果入手後就努力喇!!